ینگی کون «نوروز»ـ

نـوروز قـیـش شـرط‌لــری‌نینگ توگه‌نیب طبیعت‌نینگ اویغانیشی، قار و موزلرنینگ اېریب، آقگن اریغ‌لرنینگ جـۉشـیـب تـاشـگـنـی، چـېـچـکـلـرنینگ آچیلیشی، یغاچ‌لرنینگ یشَریشی، کېچه بیلن کوندوزنینگ تېنگ بۉلیشی و انـسـان‌لرنـیـنـگ قـلبی‌ده گۉزه‌ل تویغولرنینگ تیریلیشی، بهارنینگ مژده‌سی بۉلگن شمسي هـجـري بـیـریـنچی حمل (میلادي 21 مارچ) کونی‌ده مشرق‌دن مغرب‌گه، شمال‌دن جنوب‌گه بوتون تورک دنـیـاسـی‌ده اۉرتـه آسـیـاده یـشـه‌یـاتگن اۉزبېک، اۉیغور، تورکمن، قزاق، قیرغیز همده بالکان تورک‌لریده، تورکـیـه‌ده، افـغـانـسـتـان‌ده، تـاجـیـکـستان، هندوستان و ایران‌لیک‌لرنینگ ینگی کون و یا ییل‌باشی قبول اېتگن‌لری نوروز بویوک بیر جۉشقین بیلن قوتله‌نیلماقده دیر.

نــوروز بـیـزنـیـنگ اوچون نیمه‌نی افاده اېته‌دی؟ نوروزنینگ تاریخی قه‌یېردن باشله‌نیب کېلیبدیر؟ نوروز اون بیرینچی عصرده یازیلگن ایران‌لیک‌لرنینگ «شاهنامه» سیده‌گی تخت جمشیددن بـاشله‌نیب کېلیب‌می؟ یــۉق اېسه خـِتـای (چـیـن) تـاریـخـي کـتاب‌لـریـده هون تورک‌لری حقیده میلاددن آلدین ییتینچی عصرده یازیلگن قـویـاش ییلی‌نینگ بیرینچی آیی حمل (مارچ-اپریل) آیی‌ده باشله‌نه‌یاتگن مراسم‌لرنی نوروز بیلن بیر ایلگیسی (علاقه و ارتباطی) بارمی؟ بو سۉراق‌لرنینگ جوابی‌نی تاپماق اوچون تاریخ کتاب‌لری‌گه باقماق کېره‌ک.

ـ نوروزنینگ اۉزه‌ل‌لیک‌لری (خصوصیت‌لری) دن بیری: قویاش ییلی‌نینگ باشله‌نیشی، یعنی ینگی ییل دیر.

ـ ایکّینچی اۉزه‌ل‌لیگی: قیزغلداق یا که لاله دیر که افغانستان‌ده «میلۀ گل سرخ» دېییلماقده.

ـ اوچینچی‌سی نوروز داستان‌لری دیر که «شاهنامه» ده اَیتیلگن.

ـ اون ایکّی حیوان‌لی تورک تقویمی

ـ قویاش ییلی تقویمی

تورک‌لرنینگ اسلامیت، عیسوی‌لیک، موسوی‌لیک دین‌لریدن آلدینگی دینی شمنیزم بۉلگن، «کمنلیک یاکه شمنلیک» کۉک تنگری دینی‌ده قویاش‌نینگ ایریم بیر یېری باردیر. حتّی سیبیریه (سایبریا) ده تاپیلگن تورت مینگ (4000) ییل آلدین تورکچه یازیلگن تاش‌لر یوزیده و بوندن آلتی مینگ (6000) ییل آلدین سومری‌لر (سومری‌لر تورک اېدی) و مصرلیک‌لر زمانی‌دن قالگن قویاش شکللریگه اۉخشه‌گن قویاش رسم‌لرینی کۉریش ممکن. چونکه کۉک تنگری دینی‌ده تنگری خدا دیر و کۉک هم آسمان دیر، یعنی آسمان تنگری‌سی (آسمان خداسی) و قویاش آسمان‌ده دیر. قیش‌نینگ کېتیشی بیلن بهارنینگ کېلیشی، چېچک‌لرنینگ آچیلیشی ارّنگ قویاش‌نینگ چیقیشی بیلن ممکن. بونینگ اوچون قویاش تنگری طرفی‌دن انسان‌لرگه سونولگن بیر لطف دیر. بوکون روسیه‌نینگ شمالی سیبیریه‌سیده سکا تورک جمهوریتی و جنوبی‌ده آلتای تورک جمهوریتی باردیر. بو خلق‌لر بیر مینگ ییل‌دن بیری باشقه تورکی خلق‌لر بیلن ارتباط‌لری کېسیلگن، دین‌لری موسوی‌لیک، عیسوی‌لیک و اسلام اېمَس، بلکه کملیک یعنی شمنیزم دیر.

بو خلق‌لرنینگ ییل‌باشی کونی بهارنینگ کېلیشی نوروز کونی‌دور. بو ییل‌باشی کونی‌گه قویاش بیره‌می دېیلماقده. بو خلق‌لر آره‌سیده بهارنینگ کېلیشی بیلن ینگی کییم‌لر کییله‌دی، تورلی یېمـَک‌لر پیشیریله‌دی و دعالر اۉقیله‌دی و تورک‌لرنینگ آته سپورتی بۉلگن اۉغلاق اۉینَله‌دی. بولر بیر تصادف بۉلمَسه کېره‌ک.

تورک‌لرنینگ قۉللـه‌نگن اون ایکّی حیوان‌لی تقویمی هم باشلنغیچ کونی حمل آیی‌نینگ بیرینچی کونی، نوروز کونی دیر. شمسي تقویم‌نینگ آی‌لری حمل، ثور، جوزالر ایران‌لیک‌لر تامانیدن فروردین، اردیبهشت، خُرداد، مردار دېییب اۉزگرتیریلگن. نظام‌الملک میلادی اون بیرینچی عصر یازووچی‌سی «سیاست‌نامه» آت‌لی اثری‌ده نوروزنینگ تورک‌لرگه عاید بیره‌م و ییل‌باشی کونی بۉلگـَنینی یازگن (کۉریلسین!). ینه کاشغرلیک محمود تورک‌لرده ییل‌باشی‌نینگ نوروز بۉلگنینی افاده اېتگن...

مارکوپولو بوندن سکّیز یوز (800) ییل آلدین قوبیلای‌خان‌نینگ آی و قویاش رسم‌لری بیلن بېزه‌نگن بیراق‌لریدن سۉز یۉریته‌دی. تورک‌لرنینگ اسلامیت‌نی قبول اېتگن ییل‌لریده یازیلگن «اۉغوزنامه» قهرمانی «بیراغی‌میز قویاش بۉلسین» دېیدی. سلجوق‌لیک‌لر جامع مناره‌لرده، کتاب‌لرده قویاش رسمی‌نی چیزیب محتشم اثرلر یره‌تگن‌لر. ینه فرانسه‌لیک بیر تاریخچی و یازووچی ژین پاول رووکس (Jean Paul Roux) «تورک‌لرنینگ و مغول‌لرنینگ اېسکی دینی» آت‌لی اثری‌ده قوییده‌گی‌لرنی یازه‌دی:

«حقیقت‌ده تورک‌لرگه عاید بۉلگن اون اوچینچی عصردن باشله‌نیب اسلام توپراق‌لری‌ده (زمین‌لری‌ده) اېنگ دقت چېککن شکل، بیر ارسلان‌نینگ بېلیگه یېرلشتیریلگن و سۉنگره‌لری قۉلی‌گه بیر قیلیچ توتیب ایران‌نینگ بیراغی بۉلگن یریم قویاش‌دیر. قیلیچ ارسلان آتی تورک خلق‌لری آره‌سیده کۉپ یایگین (یاییلگن، گسترده)، مُغولستان و سیبیریه‌ده‌گی تاش‌لر یوزی‌ده یازیلگن...» روسیه‌ده‌گی آلتای جمهوریتی‌ده بیر روس عالمی ایوانف 50 شمان دپلریدن (داول) 38 دانه سیده قویاش و آی رسم‌لری چیزیلگنینی یازگن. بوگون بوتون تورکي خلق‌لرنینگ بیراق‌لری‌ده آی و یولدوز رسم‌لرینی کۉریش ممکن...

نوروز ساکا تورک‌لری قویاش بیره‌می، آلتای تورک‌لری چیلغیاق بیره‌می، آذربایجان نوروز، اېرکنه کون بیره‌می، بۉرکورت بیره‌می، باشقورت تورک‌لری اېکین بیره‌می، شرقي تورکستان ینگی کون، باش بهار، گگاووزلر ایلک یاز، قاره چای- ملکار تورک‌لری گوللو، گوتن، سبان تای، تېگری قاره قلپاق‌لر- تېریک کمه‌لر اېرگنه کون بیره‌می، قیرغیزستان تورک‌لری نوروز، قوموق تورک‌لری یازباشی، نوغای تورک‌لری سبان تای، اۉزبیک و تاتار تورک‌لری نوروز، تورکمن‌لر تازه ییل، اویغورلر ینگی کون آت‌لری بیلن بوکون‌گه مخصوص بیر اۉنه‌م (اهمیت) و بېرماقده‌لر.

سلجوق‌لیک خان سلطان جلال الدین ملک‌شاه، عالم- بیلرمان‌لرنی سلجوق‌لیک‌لرنینگ باش کېنتی (پایتختی) اصفهان‌ده بیر یېرگه ییغیب اۉز آتی‌گه منسوب جلال الدین تقویمی‌نی توزه‌تتیردی، شمسی تقویمی آتی بیلن ایران و افغانستان‌ده قوللـه‌نیله‌یاتگن بو تقویم‌گه کۉره ییل‌باشی کونی میلادی ییل‌نینگ 21 نچی مارچ کونی‌دیر. ایران‌ده آق قویونلو حکمداری اوزون حسن نوروز، نوروز کونی‌نی ییل‌باشی قبول اېتگن، بېرگی و مالیات‌لرنی بوگون‌گه کۉره توزه‌تگن‌دیر. سلطان کلمه‌سی‌نینگ نوروز بیلن بیرلیکته (برابر) قۉللـه‌نیلیشی، پادشاه‌لرنینگ خلق بیلن بیرلیک‌ده نوروز قوتلمه‌لری‌گه قۉشیلیشی بیلن ارتباطلی‌دیر. ایکّینچی عبدالحمید زمانی‌گه‌قدر یعنی عثمانی دولتی‌نینگ سۉنگی پادشاهی (قدیمگی تقویم‌گه کۉره) مارچ توقّیزی یعنی نوروز کونی قوتله‌نیله‌ر اېدی...

لاله، قیزیل رنگ و نوروز

قیزغلداق یا لاله‌نینگ اصل وطنی پامیر تاغ‌لری‌نینگ اېتـَک‌لری‌دیر. ایلک دفعه سلجوق‌لیک‌لر اناتولی بوگونگی تورکیه توپراق‌لری‌گه کۉچ اېتگینچه لاله‌نینگ غوزه‌سینی یان‌لری‌گه کېتیرورلر. لاله‌نینگ شکلی‌نی توزه‌تگن جامع مسجدلری‌ده کتاب‌لرنینگ باش صفحه‌لریده، سلجوق‌لیک تورک‌لردن بیزگه میراث قالگن بوتون تاریخي اثرلرده لاله‌نینگ رسمی‌نی کۉریش ممکن. سلجوقی‌لردن سۉنگره عثمان‌لیک امپراتورلیگی‌ده هم قرال‌لیک (پادشاه‌لیک) سرای‌لری‌نینگ باغچه‌لریده لاله یېتیشتیریلگن. 500 ییل‌لیک تاریخ‌گه اېگه استانبول جامع‌لری همه‌سی‌نینگ ایچ‌لری‌ده لاله‌نینگ رسمی چیزیلگن. بیرینچی دفعه هالندلیک اېلچی 1500 نچی ییل‌لرده عثمان‌لیک سرایی‌دن لاله‌نینگ غوزه‌سینی هالندگه آلیب بارگن.

بوتون اروپا تیل‌لریده لاله‌نینگ آتی «تولیپTulip » دیر. بو تورکچه بیر سۉز. بوکون هالندنینگ اېنگ کتّه کېلری) درآمدی( لاله‌دن قۉل‌گه کېلماقده. تورک‌لر اوچون لاله‌نینگ اۉنه‌می و اهمیتی نیمه اېدی؟ لاله بهارده یېتیشه‌دی، لاله‌نینگ رنگی قیزیل و قیرمیزی دیر. یعنی اېسکی آتی بیلن «آل» دیر. آل آتش رنگی دیر. آتش قویاش‌نینگ بیر پارچه‌سی‌دیر. تورک‌لرنینگ قدیمگی کملیک و شمَنیزم دینی‌ده آتش قُدسل (مقدس) دیر. کۉپ یېرلرده نوروز آتش یاقیلیب قوتله‌نیله‌دی. مثال اوچون تورکیه‌ده، ایران‌ده.... تورک میتولوژی Metholigy، میفولوگیه- اسطوره‌سی‌ده آل یعنی قیزیل و کۉک رنگ‌لرنینگ مهم بېر اۉرنی بار. چونکه تاریخده‌گی تورک دولت و امپراتورلیک بیراق‌لری‌نینگ رنگ‌لری قیزیل یا کۉک‌دیر. آل رنگ قویاش تۉققینچه (شفق پَیتی) و ینه قویاش باتگن‌دن سۉنگره آسمان (کۉک) یوزیگه یَیره‌گن رنگ آل رنگی دیر. چونکه شمنیزم دینی‌ده انسان‌لر بو شفق وقتی‌ده دعالر اېته‌دی‌لر، بو شکل‌ده اېرتانگ وقتی قویاش‌نی دعالر بیلن قرشی‌لب، آقشام قویاش باتگونچه ینه اونی دعالر بیلن جۉنَته‌دی‌لر. آل رنگی مقدس بۉلگنی اوچون بو کلمه یوکسک، بویوک، کتّه انگلم و معناده قۉللـه‌نیلماقده دیر. آلتای جمهوریتی‌نینگ آتی «آلتاغ» دن بۉلگن. آلپ کلمه‌سی تورکچه‌دن ایتالیانچه و انگلیسچه‌گه اۉتگن بیر کلمه دیر که معناسی بویوک و یوکسک دیر. غزنه‌لیک‌لر (غزنوی‌لر) دولتی‌نینگ قورووچی‌سی‌نینگ آتی آلپتگین اېدی.

ایــرېـوانـیـنگ آل یـۉقـوشی

کېلور یازی، کېـتـر قـیـشی

شیرین بـۉلـور یار قۉشیغی

بو یېرده‌گی «آل یۉقوش» سۉزی تیکین و یوکسک بۉلیش معناسی‌ده قۉللـه‌نیلماقده.

بوکون بوتون تورک سرزمین‌لری‌ده بیلینیب اۉینه‌نیلماقده بۉلگن «آشیق» اۉیون‌لری بار. آشیق اۉیناوچی‌لر اونی بیله‌دی. بو اۉیین قۉی‌لرنینگ آرقه ایاق‌لری تیزّه قِسم‌لری‌دن چیقه‌ریلگن آشیق دېییلگن سویک بیلن اۉینه‌نیله‌دی. آشیق‌نینگ تۉرت یوزی: «چیکّه»، «پوکّه»، «تۉقه» و «آلچی» سۉزلری بیلن اته‌له‌دی. آشیق اۉیینی‌ده اېنگ معقول توریشی تیک بۉلگن آلچی توریشی‌دیر. اۉیون‌لرده آشیق‌نینگ آلچی توریشی شانس‌لی و بخت‌لی سنه‌له‌دی.

آذربایجان‌ده، قزاقستان‌ده، جنوبی تورکستان (افغانستان) خلق آغزیده ایـتـیـلـه‌دیـگن «فلان کیشی‌نینگ آشـیـغـی آلـچـی تـوریـبـدی»، دېگن جمله، یعنی او کیشی‌نینگ شانسی، طالعی آچیلیبدی دېماق‌دیر.

شمنـیـزم دینـی‌ده آتـش‌نـیـنـگ یامان روح‌لرنی قۉویش بیر خصوصیتی بار دیر. انسان‌لرنی یامان روح‌لردن اریندیره‌دی، اریـتـه‌دی. آلـتـیـنـچـی عـصـرده بیزانس امپراتورلیگی‌دن اېلچی‌لر کۉک تورک امپراتورلیگی‌گه کـېـلـگـن. کـۉک تـورک‌لـر بـو اېـلـچـی‌لرنی ایکّی طرف‌ده یاقیلگن آتش آره‌سیدن اۉتکزگنی روم تاریخی‌ده یـازیلگن. قـزاق‌لـرده بـیـر کـیـشـی کـسـل بـۉلـگـنـی‌ده یـاغـلـی بـیـر نرسه‌نی یاقیب کسل کیشی‌نینگ چېگه‌ره‌سـیـدن «الس الس»* دېیله‌دی. یالغیز قیزلر بخت‌لری آچیلیشی اوچون «آتیل- ماتیل چهارشنبه، بختی آچـیل چهارشنبه» دېب آلاو اوستی‌دن بۉکه‌دی‌لر. جنوبی تورکستان (افغانستان) تورکی خلق‌لری ایشانـچ‌لـری‌دن بـیـری «بیـر کـیـشـی‌گـه نـظر تېگمه‌سین» دېب، او کیشی‌نینگ شانه‌سی‌گه قیزیل بیر قُماش بیر لتّه باغله‌ب قۉیه‌دی‌لر.

تورکمن خاتین‌لری بۉرک‌لری (تاقّی و یا قصبه‌لری) نینگ رنگ‌لـری قـیـزمـیـزی دیـر. قــۉل بیـلـن تـۉقـیـلگن قالـیـن‌لریـمـیـزنـیـنـگ رنـگ‌لـری «آل» قـیـزیـل‌دیـر. ایـران‌ده‌گـی صـفـوی تورک دولتی‌نینگ اوروشچی‌لری پیشانه‌لری‌گه قیزیل بیر لتّه باغ‌لر اېدی که بولرگه سۉنگره‌راق قیزیل باش تورک‌لر دېییله باشله‌دی. جنوبی تورکستان (حاضرگی افغانستان) تورک‌لری‌نینگ بیر قِسمی قیزیل باش تورک‌لری‌دیر.

میلادی 1072 ییل‌ده یازیلگن کاشغرلیک محمودنینگ «دېوان لغات التُّرک» کتابی‌ده قیزیل رنگ‌نینگ یامان‌لیک‌لردن قۉرویدیگن صفتی یازیلگن. اېسکی زمان‌لرده تورکستان‌ده پاره (پول) چیقمه‌سدن آلدین کییله‌دیگن حیوان تېریسی «کورک» پول اۉرنی‌گه یوریتیله‌ردی. کورک‌نینگ قدیمگی آتی «تین» اېدی. اېنگ قیمت‌لی تین قویاش آل (قیزیل رنگی) اېدی. قویاش‌نینگ قیزیل رنگی «آل»، کورک‌نینگ آتی بیلن بیرله‌شیب «آل-تین» کلمه‌سینی اۉرته‌گه چیقرگن که تورکستان‌ده طلا دېمک دیر. ینه بیزلر ارزش‌گه و تېمیرپاره‌گه «تېنگه/تنگه» دېیه‌میز: (اوغان‌گه سلام بېردینگ، قیرق تنگه تاوان بېردینگ». بو آت هم آلتین سۉزی بیلن نېگیزداش دیر. بوگون قزاقستان جمهوریتی پول بیرلیگی‌نینگ آتی تنگه دیر. روسیه‌ده پاره یا پول معناسی‌ده قۉللـه‌نیله‌دیگن «دېنگی Денги» سۉزی تورکچه‌دن روسچه‌گه اۉتگن «تنگه» نینگ روسچه تلفظی‌دیر.

داستان‌لریمیز

داستان‌لر بیر ملت‌نینگ مدنیت بارلیغی‌دیر. او ملت‌لرنینگ تاریخ صحنه‌سی‌گه چیقیشینی، شهامتی‌نی، قهرمان‌لیک‌لرینی سۉزله‌یدیگن بیر عنصر دیر. نوروز بیلن ارتباطلی اېنگ کتّه داستان «اېرگنه کون» داستانی‌دیر. تورک‌لر میلاددن آلدینگی آلتینچی عصرده دشمن‌لرگه قرشی بیر اوروش‌ده یېنگیله‌دی‌لر، کیینگه چیکیلیب اۉرمان‌لی ایکّی تاغ‌نینگ آره‌سیده تۉرت یوز ییل یشه‌ب کۉپه‌یگن‌لری‌دن سۉنگ بو تاغ‌لردن چیقماق اوچون یۉل آخته‌ره‌دی‌لر. ایچ‌لری‌دن بیر کیشی تېمیر کانینی تاپه‌دی و «بو معدن‌نی اېریتیب بو ییردن چیقه‌میز» دېیدی. تېری توزه‌تیلگن یېتمیش یېرده یېتمیش قۉروق تیارلب بو قۉروق‌لرنی یاقه‌دی‌لر. اوشبو تېمیر معدن‌نی اېریتیب دشمن‌لرگه قرشی اوروشماق مقصدیده بو یېردن چیقیش کونی‌نی «اېرگنه کون» یعنی قوتیلیش کونی دېیدی‌لر.

تېمیر و تېمیرچی‌لیک آیینی تورک‌لرگه عاید بیر حرفه دیر. آت اوستی‌ده قیلیچ آسیب، دنیانینگ اوچ قطعه (قاره) سیده حکم سورگن اروپا هون تورک‌لری‌نینگ بویوک خانی آتیلانینگ قیلیچ داستانی... چینگیزخان‌نینگ اصل آتی «تېموچن» دیر که تېمیرچی کلمه‌سیدن آلینگن... اولوغ بابامیز بویوک صاحبقران امیر تیمورنینگ آتی هم تېمیردن آلینگن... ایران بیر مینگ ییل دوامی‌ده تورک و مغول‌لرنینگ حاکمیتی‌ده یشه‌گن. ایران‌لیک‌لر بو تېمیرچی‌لیک حرفه‌سینی فارس‌لرگه عاید بۉلگن دېب «اېرگنه کون» داستانی‌گه اۉخشه‌گن داستان‌لر یازگن‌لر.

نوروز بیلن ارتباطلی بویوک هون امپراتورلیگی‌ده میلاددن آلدینگی اوچینچی عصرده مېته قاغان زمانی‌ده مارچ آیی‌ده ینگی ییل مناسبتی بیلن تۉرین‌لر، مراسم‌لری خــِتای (چین) تاریخي کتاب‌لری‌ده یازیلگن.

ایران‌لیک‌لرنینگ هیچ بیر تاریخي بیلگه‌سی یۉق. فقط شاهنامه‌ده یازیلگن داستان فارس ملتی‌نینگ اېزیلگن بیر زمان‌ده فردوسی 30 ییل اورینیب فارس ملتی‌نینگ تورک و عرب‌لردن اوستون بۉلگه‌نینی اثبات‌له‌ماق اوچون یازیلگن (او زمان‌ده کوچ و قدرت تورک‌لرنینگ قۉلی‌ده و دین ایش‌لری، یازوو تیلی عرب‌لرنینگ قۉلی‌ده بۉلگن. فردوسی «اۉلماققه یوز توتگن فارس تیلی‌نی یاکه فارس خلقی- عجم‌نی عربچه‌گه قرشی ینگی‌دن تیریلتیردیم»:

بسی رنج بردم در این سال سی

عـجـم زنـده کـردم بـدیـن فارسی

دېیدی.)

نوروز بیره‌می‌نی تخت جمشید بیلن ارتباط‌لنتیریب فارس‌لرنینگ بیر «قوتیلیش کونی» دېیدی. دقت قیلیش کېره‌ک که شاهنامه هم تورک‌لر حکمران بۉلگن بیر زمان‌ده یازیلگن که تورک کلتوری و مدنیتی‌دن کۉپ نرسه‌لر اۉغورله‌گن... ایران‌لیک‌لرنینگ شاهنامه‌دن آلدین نوروز بیلن باغلیق بۉلگن هیچ بیر تاریخي معلومات و تاریخي اثرلری یۉق... شاهنامه تورک‌لر حکمران بۉلگن بیر زمان‌ده غزنه‌لیک سلطان محمودگه اتحاف اېتیلگن و او شخص‌گه هدیه ارمغان اېتیلگن بیر اثردیر...

افغانستان‌ده نوروز کون‌لری‌ده اجرا اېتیله‌دیگن آته سپورتیمیز اۉغلاق اۉیینی، بوکون دنیاده فارس تیلی بیلن «بزکشی» دېب تنیتیلماقده... آت‌لر و اسم‌لر مهم اېمَس، تاریخ مهم، بېلگی نشانه‌لر مهم‌دیر.

بـوکـون تـــاغ‌لـر یـشیـل‌له‌ندی

یازنینگ باشی صفـا کـېـلـدی

جمله قوش‌لر هپ* تیلـله‌ندی

سلطان نوروز صفا کېلدیـنـگ!

بــوگـــون بـهــار ایـامـی دیـــر

نـوروز تـورک‌نینگ بیره‌می دیـر

کۉنگول‌لرنینگ سلـطـانـی دیـر

اولوس کونی، صفا کېلـدینگ!

تـېـنـگـری دېیه اۉتگن قـوش‌لر

دعــا ایــلــر تــاغ‌لـر، تــاش‌لـر

یشیـل‌لـنـدی هــپ یـغــاچ‌لـر

تــازه بــهــار صفـا کېلـدیـنـگ!

کېچدی قیش و دۉندیک یازگه

قــۉشیـقـچی‌لـر اوره‌ر سـازگه

قــویـاش بـاقـدی قیـزغلداغ‌گه

«ینگی‌کون» نوروز، خوش‌کېلدینگ!

حرمت بیلن

یازوچی: ب. یوزبېگی

ـ* هپ: همه، برچه.