هجری 1389 ییل سرطان آیی نینگ 18 نچی سی (میلادی 2010 ییل جولای آیی نینگ 9 نچی کونی) سرپل شهریده‌گی «بیانی اجتماعی و فرهنگی بنیادی» محوطه‌سیده، رحمتلی عبدالغفار بیانی تولدیدن 58 ییل و وفاتیدن 10 ییل اوتگَنی و «امیر علیشیر نوایی کتابخانه‌سی» نینگ آچیلیشی مناسبتی بیلن، بیانی بنیادی تمانیدن طنطنه‌لی مراسم اوتکه‌زیلدی. اوندن بیرنیچه آی اوتگن بولسه هم، کمینه اوشبو مراسم بوییچه چیت ایلده‌گی وطنداشلریمیزگه کینگراق معلومات بیریش اوچون اوشبو ییغیلیش نینگ بیر اشتراکچیسی صفتیده، بولیب اوتگن مراسم حقیده قسقه‌چه بیر راپورتاژ یازیب، برچه فرهنگ سیور وطنداشلریمگه ارایه قیله‌من

ییغیلیش، احمد سهیل ارلات آرقه‌لی یخشی اسلوبده آلیب باریلدی. قاری عبدالعزیز تمانیدن قرآن کریمدن بیر نیچه آیت تلاوت قیلینگندن کیین، سید انور رحمتی سرپل والی سی جمهور رئیس حامد کرزی نینگ تسلیت و تبریک سوزلرینی اوقیب ایشیتدیردی. اوندن سونگ بنیاد رئیسی الماس بیانی، کاندید اکادمیسین دوکتور محمد یعقوب واحدی یازگن «زندگینامۀ مرحوم عبدالغفار بیانی» سرلوحه‌لی مقاله‌نی قرائت قیلدی

سونگره محفلگه قتنه‌شگن یازوچیلر و شاعرلر، بیر بیریدن- کیین سوزگه چییقیب اوز شعرلرینی اوقیدیلر. بیز اولرنی، شعرلری نینگ قسقه‌چه نمونه‌لری بیلن قوییده‌گیدیک تنیتیب اوته‌میز

استاد محمد امین اندخویی (بیادبود بیانی) دیگن شعری، سید یحیی نادری مزار شریفدن «به خاطر آمدم یاد جوانی» عنوانلی شعر، محمد یحیی حفیظی جوزجانی «ای بویوک خلقیم فدای خشم و عصیانینگ بوله‌ی» شعری و «زندگانی بی بیانی مشکل است» شعری، شاعر، خطاط و یاش عالم عبدالحی علمی بیر چیرایلی ملمع (اوزبیک و فارسی تیللریده) قصیده اوقیدی. اوندن کیین الحاج محمد اشرف عظیمی «حکم تقدیر» شعرینی، پوهندوی محمد صالح راسخ، دوکتور برزین مهر، بلخ اونیویرستیتی تیل و ادبیات فاکولته‌سی استادلری اوشبو احتفال مناسبتی بیلن سوزله‌شدیلر. عبدالصمد راسخ جوزجان ولایتی نینگ اداری رئیسی، جوزجان ولایت مقامی نینگ پیامینی قرائت قیلدی. اوندن سونگ استاد سیف الدین نوری، انجنیر محمد ابراهیم یعقوبزاده، محمد هاشم مخدوم و صدرالدین انتظار اوز شعرلرینی قرائت قیلدیلر. محفلگه شاعر و یازوچی سید عیسی نیک آیین، شاعر و یازوچی تاشقین بهایی، شاعر و محقق استاد محمد عمر الیم بیات، محمد اسماعیل تیمور و باشقه بیر قطار شاعر و ادیبلر هم اشتراک قیلگن ایدیلر

محفل جریانیده تدقیقاتچی عالم محمد حلیم یارقین مرحوم بیانی تامانیدن بجریلگن نوایی خمسه‌سی نینگ نشری بوییچه اهتمامی و «مکارم الاخلاق» کتابی نینگ نشری قنچه اهمیتگه ایگه ایکنلیگی باره‌سیده گپیریب، امیر علیشیر نوایی کتابخانه‌سی، دوکتور واحدی نینگ 50 ییلگه یقین سعی و کوششی نتیجه‌سیده یوزه‌گه کییلگن لیگی حقیده معلومات بیریب، «افغانستان قلم انجمنی» تمانیدن یوباریلگن 100 جلد کتابنی کتابخانه‌گه تقدیم ایتدی

شونینگدیک اروپاده‌گی «افغانستان تورکلری مدنی فدراسیونی» نینگ تسلیت و تبریک پیامی سراج الدین قیتمس تمانیدن تقدیم ایتیلدی. مخدوم قلی فراغی فرهنگی انجمنی، جوزجان ولایتی نینگ معارف ریاستی، تخنیک انستیتوتی، اطلاعات و فرهنگ ریاستی، معلملر تربیه‌سی ریاستی و جوزجان یاشلر حرکتی تمانیدن یوباریلگن تسلیت و قوتلوق بولسین پیاملری اعلان ایتیلیب تشکر بیلدیریلدی

شونینگدیک پوهنمل محمد یوسف اوچقون جوزجان اونیویرستیتی و استاد اسلم گداز ظهیر فاریابی فرهنگی انجمنی، ایشانچ فرهنگی بنیادی و ایرکین یازوچیلر انجمنی تمانیدن و علیشیر انتظار فریغونیان مطبعه‌سی، سراج الدین قانع ظهیرالدین محمد بابر فرهنگی انجمنی تمانیدن سوزگه چیقیب تسلیت و تبریک مراتبینی بیلدیردیلر

سونگره کاندید اکادمیسین دوکتور محمد یعقوب واحدی بوگون آچیله‌دیگن «امیر علیشیر نوایی کتابخانه‌سی» حقیده معلومات بیریب، اونده‌گی کتابلر او نینگ سفرلری جریانیده، تورکیه، اوزبیکستان، تاجیکستان، آذربایجان، اوکراین و روسیه‌دن آلیب کیلینگن، اونده اسلام دینی ترقه‌لیشیدن باشله‌ب بوگونگه قدر برچه دورلر تاریخ و مدنیتی گه تیگیشلی کتابلر موجود دیدی. او، تأ کیدله‌دی: کتابخانه‌ده دنیا شرق شناسلیگی، اینیقسه ساویت شرق شناسلیگی علمیگه عاید اینگ مهم اثرلر، شونینگدیک دری، اوزبیکی، تورکی، عربی و انگلیسی ادبیاتی تاریخی گه تیگشلی کتابلر موجود، دایرةالمعارف اطاقی سونگگی 50- 60 ییللرده نشرایتیلگن کتابلرنی اوز ایچیگه آله‌دی. دکتور واحدی قوشیمچه قیلیب دیدی، کتابخانه‌ده تورلی تیللر بوییچه کتته کیچیک سوزلیکلر (فرهنگ و قاموسلر) جایلشتیریلگن، نقاشلیک، موسیقی، خطاط لیک و باشقه صنعت و هنر بوییچه مخصوص الماری لر اجره‌تیلگن، شونینگدیک تاریخی جغرافیا و عمومی جغرافیا، شرق ییریک عالم و شاعرلری ابوریحان بیرونی، ابن سینا، نظامی گنجوی، امیرخسرو و عطار حقیده ییترلی کتابلر ییغیشتریلگن. نوایی حقیده 300 جلد کتاب، مولانا جلال الدین حقیده 150 جلد کتاب بار. بولردن تشقری باشقه فنلر جمله‌دن حقوق، زراعت و اقتصاد گه تیگشلی کوپ کتابلر موجود. کتابخانه نینگ سونگگی قسمیده موقوت نشریه‌لر جمله‌دن کابل ادبی مجله‌سی و یولدوز جریده‌سی نینگ کلکسیونلری موجود

اوندن کیین حرمتلی محمد عالم لبیب، استاد محمد عمر الیم بیات، سید انور رحمتی سرپل والی سی و باشقه بیر قطار عالم و ادیبلر تمانیدن کتابخانه آچیلیب، دکتور واحدی تمانیدن هر بیر غرفه و الماری کتابلری باره‌سیده اشتراکچیلرگه معلومات بیریلدی. اوشبو احتفال آخریده آش تارتیلیب، بیانی اجتماعی و فرهنگی بنیادی تمانیدن مهمانلرگه ضیافت بیریلدی. محفل نینگ اوّلیدن آخریگه‌چه اتاقلی اشوله‌چی ملا تاج محمد سرپلی تمانیدن یاقیملی کویلر و قوشیقلر اجرا ایتیلیب، اشتراکچیلرگه حلاوت بغیشله‌ب کیلدی