اوزبيکستان اولکه‌سینی يقيندن کوريش موضوع‌سی بوکونگى کونده افغانستان‌ده يشه‌يديگن هر بير اوزبيک نـيـنـگ حـيـاتـيـده‌گـی ايـنـگ مـهـم ريـجـه‌لـريدن بيريگه اَيله‌نیب قالگن. بوندن بير ييل آلدين افغانستان نينگ اوزبيـکـلرى زیچ يشه‌يديگن جوزجان- فارياب آره‌سیده‌گی يولده یوز بيرگن بير ماشینه حادثه‌سی نتیجه‌سیده باشیـم، بـوينيم و بيليم‌دن قتيق يره‌له‌نديم. تيزليکده دواله‌نيشیم ضرور ايدى. ساغليغيمنى توزه‌تیش اوچون اوزبـيـکـسـتـان‌گـه باريشيم مسئله‌سی دولت متصديلرى تمانيدن ایجابی، حل بولگندن سونگ، اوزبيکستان ایـلـچـی خـانـه‌سـیـدن کـيـريــش ویـزه‌سـیـنـی آلـديـم و چيگـره تمان يوزله‌ندیم و آمو دریا کوپريگيدن اوتيب، اوزبيکستان توپراغيگه قدم قويديم.

اوزبـيـکـستان چيگره‌چيلرى و باجخانه‌چيلرى نينگ تيکشيرویدن اوتيشيم بيلن، تـِرمذ شهری، ساعت ناملى تـورت يـولـلـيگيده ليب قالگن بير حالده، بير اوزبيک ييگيتى عمر يولداشى بيلن اوته‌ياتگن پيتده مینگه قره‌ب؛ «الـسلام و عـلـیکم، افغان می سیز؟» ديب سوره‌دی. مینی اوستيمده افغانستان اوزبيکلرى کوپ کیه‌ديگن «قاسـمـى يـقـه» ناملى کويله‌گيم بولگـنى اوچون مينى تانيب قاليشينى انگله‌دیم و افغانستان‌لیک اوزبيک مـن دیـب جـواب قـه‌يـترديم. اسمى جسور بیک ایکن، تبسم بیلن؛ «هه يخشى، مین هم کییمیز نی قره‌ب قـیـزیـقـه‌نـیـم اوچـون سـوره‌دیـم دیـب؛ «تــِرمــذگـه قــالـه‌سـیـز مـی، یا تاشکینت گه کيته‌سیز مى؟» دیب سوره‌شدی. مـیـن اوزيـمـنى دوالَش اوچون تاشکينت گه کيتماقچى من، اما تيزليکده اوچاق تکتى قنده‌ی و قه‌يـيـر دن آلـيـشـى اوچـون حـرکـت قـيـليشيم کيره‌ک دیدیم. جسور بیک، عمر يولداشى نينگ تانيشلريدن بـيـريـگـه تـيـلـفون قيليب، اوچاق ايرته توشدن کيين گه بارليگيدن خبر بيردى. مین ماشینه‌ده حرکت قيليش قرارينى آلـديم. بو ييگيت عمر يولداشى بيلن تکسى توتيب، مينى تاشکينت کيته‌ديگن محله‌گه آليب باردى و مـاشیـنـه هـيـداوچيلردن بيرى بیلن تانيشتيردى. خيرله‌شيش پيتى؛ «رحمت اکه جان ياردمينگيز اوچون!» دیـگـه‌نـیـم بـیـلن، کـوليـب- هـزلـلـه‌شـیب؛ «ينه بيرار مرته افغانستان‌دن کيلگنيز ده، مينگه اوستينگيزده‌گی کـيـيـم ديـک بـيـر کـیـیـم سـاوغـه آليب کيلينگ! کوپ ياقتيرديم» دیدی. تاشکينت گه کيته‌ديگن هيداوچى و ماشـیـنـه ارقـه‌سـیـده اوتـيرگن اوچ مسافر بیلن تيزليکده قيزيقيب آز گینه بولسه هم معرفت حاصل قيلديم. بولر، یول اوزون مينى حال و احواليمنى سوره‌ب، «راحت می سیز؟» ديگن انسان‌پرورليک سوزلرى بیلن اون ساعـتـلـيـک یـول يـوريب تـاشکـيـنـت گـه تـوشديم. انچه‌دن بيرى تاشکينت‌ده استقامت قيله‌ياتگن بير قنچه افغانستان‌لـیک اوزبـيـکـلـر همـکـارليـگى بيلن، اوزبيکستان نينگ يخشى دوکتورلرى آلديگه باريب، قریب اون بـیـش کـون تـداوی آسـتـيـده قـالـديـم. دوکـتـورلر قنچه‌لیک ايشلريگه دقّت قيليشلرى و بيمارلرنى قنچه‌لیک يخشى تداوی قيليش‌گه اورينه‌ياتگنليکلرى مينى جوده هم قوانتيردى.

اوزبيکستان‌ده قریب بير آی استقامتيم جريانيده اوزيمنى دوالـَش يانيده، تاشکينت نـيـنـگ ايريم باغلرى، دم آلیش جايلرى و رستـورانـت‌لـرينى اَيله‌نيب سیاحت قيلديم. ترمذ- تاشکينت يوليده کورکه‌ملر، باغ و راغلرنى کوريب حيـرت‌گـه قـالگـنـيـم بير تمانده، لیکن باشقه طرفدن تاشکينت نينگ پاکيزه هوا سی، سرسبزليگى، آبادانليگى، رستورانت‌لرگه پيشه‌ياتگن مزّه‌لى اوزبيک ملّی طعاملرى و اوزبيکستان‌لیک برادرلريميز نينگ مهر و مُحبت‌لرى ايسيمدن چيقمه‌يديگن خاطره‌لرنى مينگه يره‌تدى.

اوزبـيـک ملّتـى، تـاریـخ دوامـیـده تـورلـى سـاحـه‌لـرده جـمـلـه‌دن؛ عـلـم و مـعرفت، مدنیت و انسان‌پرورليک، شونينگديک، ملتيميز نينگ بابا و اجدادلرى مثلى کورمه‌گن تاريخى بنالر ایجاد قيلگنليکلرى دنیاگه بويوک بير ملّت ايـکـن‌لـيـگـيـمـيـزنـى نـمـایـان قـيـلـگن حالده، اوزبيکستان دولتى و خلقى بو ميراثلرنى نه‌فقط يخشى سقله‌گن، بلکه ينه‌ده بو ساحه‌لرنى کينگه‌یتيريب رواجله‌نتيريشيگه بی‌نهایت کوپ بها بيريب، علیحده اعتبار قـره‌تـگـن. بـو افـتـخـار نـه‌يـالـغيز اوزبيکستان دولتی و مردُمى اوچون حسابلنه‌دی، بلکه افغانستان و باشقه مملکتلر اوزبيکلرى نينگ باشينى هم کوککه کوترگن.

اوزبيکستان‌ده تـحـصـیـل آلـيـب کـيـلـگـن اُستادلريميز، اوزبيکستان‌ده تجارت فعاليت‌لرى بيلن مشغول بولگن شـخـصـلـريـمـيـز، شـونـيـنـگـديـک سـیـاحت مقصديده اوزبيکستان‌نى کوريب کيلگن افغانستان‌لیک اوزبيکلر، اوزبـيـکـسـتـان نـيـنگ قنچه‌لیک رواجله‌نگن بير اولکه بولگنينى قوم و قرينداشلریگه قصه قيليب کيلگنليکلرى اوچون بـوگـون هـر بـيـر افـغـانـسـتـان‌لـیک اوزبيک، هم‌زبان و تاریخی مشترک بولگن اوزبيکستان‌نى يقيندن کـوريـشـنـى آرزو قـيـلـه‌دی. دنـیـا ده اوزبـيک ملّتينى چيگره‌لر بير- بيراويدن آز گینه اوزاقله‌شتيرگن بولسه‌ده بـيـراق، بـو ملّت نـينگ مينگ يلله‌ب تاریخی جريانيده، عرف- عادت‌لر، تیل و ادبیات، هنر و صنعت، ملّى کييم و ملّى طعاملر و شونگه اوخشه‌گن ساحه‌لر توغريسيده قوشمه شکليده بای و بويوک مدنیت‌گه ايگه بوليب کيلگن ملّت صفتيده هیچ قچان هیچ بير ملّتدن کم بولمه‌گن بير ملّت دیر.

آرزویـم شـو کـه، تـکـرار- تـکـرار گـوزه‌ل اوزبيکـسـتـان‌نى عايله اعضالریم بيلن کوريب، ترمذده‌کى جسور بیک ساوغه‌سينى هم بيرينچى باريشيم‌گه اِيتيشتيرسَم.

اوزبيکستان، بوندن‌ده کوپراق آباد بول!ا

حبیب الرحمن قوياش

اشبو مقاله نی کیریلده هم اوقیب بیله سیزلر

ایسلتمه: اوشبو یازو، «قویاش» وبلاگیده کریل الفباسی بـیـلـن نـشـر بـولـگن دیر. بیز اونی عرب الفباسیده اوزگرتیب، نشر قیلدیک. بولوت افغانستان